menu

കടത്തനാടൻ പോരിൽ കണ്ണൂർ വീണു; ലീഗ് ഷീൽഡ് തൂക്കി കാലിക്കറ്റ് എഫ്.സി | DoolNews

സൂപ്പർ ലീഗ് കേരള മൂന്നാം സീസണിന്റെ ലീഗ് ഷീൽഡ് സ്വന്തമാക്കി മുൻ ചാമ്പ്യന്മാരായ കാലിക്കറ്റ് എഫ്.സി. കണ്ണൂർ വാരിയേഴ്സിനെ എതിരില്ലാത്ത അഞ്ച് ഗോളുകൾക്ക് തകർത്താണ് കാലിക്കറ്റ് പോയിന്റ് പട്ടികയിൽ തലപ്പത്ത് തങ്ങളുടെ ആധിപത്യം ഉറപ്പാക്കിയത്. കണ്ണൂർ ഈ മത്സരത്തിൽ പരാജയപ്പെട്ടതോടെ മലപ്പുറം എഫ്.സി മുന്നേറുകയും ചെയ്തു. കോഴിക്കോടിന്റെ തട്ടകമായ ഇ.എം.എസ് സ്റ്റേഡിയത്തിൽ നടന്ന മത്സരത്തിൽ ഹാട്രിക് നേടിയ മാക്സിമിലിയാനോ ഉറൂട്ടിയുടെ മിന്നും പ്രകടനത്തിന്റെ കരുത്തിലാണ് കാലിക്കറ്റ് വിജയം കൈവരിച്ചത്. ഈ സീസണിലെ ആദ്യ ഹാട്രിക്കിനാണ് ആരാധകർ സാക്ഷികളായത്. മത്സരത്തിൽ 14, 45+2, 67 എന്നീ മിനിറ്റുകളിലായിരുന്നു താരത്തിന്റെ ഹാട്രിക് നേട്ടം. ക്യാപ്റ്റൻ പ്രശാന്ത്, ലിയോ ഡേവിഡ് എന്നിവർ ഓരോ ഗോൾ വീതം നേടി ആതിഥേയയുടെ വിജയം ആധികാരികമാക്കി. മത്സരം തുടങ്ങി 18 മിനിറ്റ് ആയപ്പോഴേക്കും കണ്ണൂർ ആദ്യ തിരിച്ചടി നേരിട്ടിരുന്നു. മനോജ് കണ്ണൻ ചുവപ്പുകാർഡ് കണ്ട് പുറത്തായത് സന്ദർശകർക്ക് വലിയ തിരിച്ചടിയാണ് നൽകിയത്. ബാക്കിയുള്ള നിമിഷങ്ങളിൽ പത്ത് പേരായാണ് കണ്ണൂർ കളിച്ചത്. ഈ അവസരം കൃത്യമായി മുതലെടുക്കാനും കാലിക്കറ്റിന് സാധിച്ചു. ഈ സീസണിൽ ഇരുടീമുകളും ആദ്യ മത്സരത്തിൽ ഏറ്റുമുട്ടിയപ്പോഴും വിജയം കാലിക്കറ്റിനൊപ്പമായിരുന്നു. കണ്ണൂരിന്റെ തട്ടകത്തിൽ നടന്ന മത്സരത്തിൽ എതിരില്ലാത്ത ഒരു ഗോളിനായിരുന്നു കാലിക്കറ്റിന്റെ വിജയം. ഇപ്പോൾ സ്വന്തം തട്ടകത്തിലും കാലിക്കറ്റ് ഈ ആധിപത്യം തുടർന്നിരിക്കുകയാണ്. കഴിഞ്ഞ മത്സരത്തിൽ തിരുവനന്തപുരം കൊമ്പൻസിനെ ഒന്നിനെതിരെ രണ്ട് ഗോളുകൾക്ക് വീഴ്ത്തി കാലിക്കറ്റ് സെമിയിലേക്ക് രാജകീയമായി മുന്നേറിയിരുന്നു. തുടർച്ചയായ മൂന്ന് സീസണുകളിലും സെമി ഫൈനലിലെ തങ്ങളുടെ സാന്നിധ്യം ഉറപ്പാക്കിയിരിക്കുകയാണ് കാലിക്കറ്റ്. കഴിഞ്ഞ സീസണിൽ കാലിക്കറ്റ് എഫ്.സി കണ്ണൂർ വാരിയേഴ്സ് എഫ്.സിയോട് പരാജയപ്പെട്ട് തങ്ങളുടെ പോരാട്ടം അവസാനിപ്പിക്കുകയായിരുന്നു.ആദ്യ സീസണിൽ തന്നെ കിരീടം നേടിയ കാലിക്കറ്റ് എഫ്.സി ടൂർണമെന്റിലെ സ്ഥിരതയാർന്ന ടീമുകളിൽ ഒന്നാണ്. ഇത്തവണ കഴിഞ്ഞ സീസണിൽ നഷ്ടമായ കിരീടം തിരിച്ചുപിടിക്കാനായിരിക്കും കാലിക്കറ്റ് ലക്ഷ്യം വെക്കുക. Content Highlight: Calicut fc beat Kannur Warriors fc in super league Kerala

സൂപ്പർ ലീഗ് കേരള: തൃശൂരിനെ 2–1നു തോൽപ്പിച്ച് മലപ്പുറം, രണ്ടാം സ്ഥാനത്ത്

Fed up with ads? Go Premium today. എസ്.പി. ശരത് Published: November 15, 2026 12:52 PM IST 1 minute Read മാജിക് എഫ്സിയെ 2-1നു കീഴടക്കി മലപ്പുറം എഫ്സി സൂപ്പർലീഗ് കേരള ഫുട്ബോളിന്റെ പോയിന്റ് പട്ടികയിൽ രണ്ടാംസ്ഥാനത്തെത്തി, മത്സരത്തിന്റെ 40-ാം മിനിറ്റിൽ പ്രതിരോധ താരം ഹരികൃഷ്ണൻ ചുവപ്പുകാർഡ് കണ്ട് പുറത്തായത് തൃശൂരിന് തിരിച്ചടിയായി, മലപ്പുറത്തിനായി എൽഫോഴ്സിയും ഗ്രേസ് ഒബിയാങ്ങും ഗോളുകൾ നേടിയപ്പോൾ തൃശൂരിന്റെ ആശ്വാസ ഗോൾ ശിലാജിത് സാന്ത്രയുടെ വകയായിരുന്നു Link Copied തൃശൂർ ∙ ഒരു ചുവപ്പുകാർഡിൽ ത്തട്ടി മാജിക് എഫ്സിയുടെ സെമി പ്രതീക്ഷകൾക്കു ചുവപ്പു സിഗ്നൽ. സ്വന്തം മൈതാനത്തു പത്തുപേരുമായി ചുരുങ്ങേണ്ടി വന്ന മാജിക് എഫ്സിയെ 2–1നു കീഴടക്കി മലപ്പുറം എഫ്സി സൂപ്പർലീഗ് കേരള ഫുട്ബോളിന്റെ പോയിന്റ് പട്ടികയിൽ രണ്ടാംസ്ഥാനത്തെത്തി. 42ാം മിനിറ്റിൽ എൽഫോഴ്സിയുടെ ഗോളിൽ മുന്നിലെത്തിയ മലപ്പുറത്തെ ആദ്യപകുതിയുടെ അധിക സമയത്ത് (45+3) ശിലാജിത് സാന്ത്രയുടെ ഗോളിലൂടെ തൃശൂർ സമനിലയിൽ പിടിച്ചെങ്കിലും 86ാം മിനിറ്റിൽ ഗ്രേസ് ഒബിയാങ് വിജയഗോൾ കുറിച്ചു. 40ാം മിനിറ്റിൽ പ്രതിരോധതാരം ഹരികൃഷ്ണൻ ചുവപ്പുകാർഡുകണ്ട് പുറത്തായതാണ് തൃശൂരിനു തിരിച്ചടിയായത്. നായകൻ മെയിൽസൺ ആൽവ്സ് ഏഴാം മിനിറ്റിൽ പരുക്കേറ്റു കളംവിട്ടതിന്റെ ആഘാതവുമായാണു തൃശൂർ തുടങ്ങിയത്. പകരക്കാരനായെത്തിയതു ഹരികൃഷ്ണൻ. 18ാം മിനിറ്റിൽ അബ്ദുൽ സമദ് പരുക്കേറ്റു മടങ്ങിയതോടെ അടുത്ത തിരിച്ചടി. 40ാം മിനിറ്റിൽ ഹാദ്സിച്ചിനെ ഫൗൾ ചെയ്തതിനാണ് ഹരികൃഷ്ണനു ചുവപ്പുകാർഡ് കിട്ടിയത്.

തൃശൂരിനെ വീണ്ടും വീഴ്ത്തി; ശക്തന്റെ കോട്ടയിൽ മലപ്പുറത്തിന്റെ തേരോട്ടം | DoolNews

സൂപ്പർ ലീഗ് കേരളയിൽ തൃശ്ശൂർ മാജിക് എഫ്.സിക്കെതിരെ മലപ്പുറത്തിന് തകർപ്പൻ വിജയം. തൃശ്ശൂരിന്റെ തട്ടകത്തിൽ നടന്ന മത്സരത്തിൽ ഒന്നിനെതിരെ രണ്ട് ഗോളുകൾക്കാണ് മലപ്പുറം വിജയിച്ചുകയറിയത്. ഇതോടെ ഈ സീസണിൽ ഹോമിലും എവേയിലും തൃശ്ശൂരിനെതിരെ വിജയത്തിന്റെ ആധിപത്യവുമായി മലപ്പുറം കുതിക്കുകയാണ്. മലപ്പുറത്തിന്റെ തട്ടകമായ മഞ്ചേരി പയ്യനാട് സ്റ്റേഡിയത്തിൽ നടന്ന മത്സരത്തിൽ എതിരില്ലാത്ത നാല് ഗോളുകൾക്ക് വിജയം കൈപ്പിടിയിലാക്കിയ മലപ്പുറം എതിരാളികളുടെ തട്ടകത്തിലും വിജയം സ്വന്തമാക്കി മുന്നേറുകയാണ്. മത്സരത്തിൽ ആദ്യ ഗോൾ നേടിയത് മലപ്പുറം ആയിരുന്നു. ആദ്യ പകുതി അവസാനിക്കാൻ മിനിട്ടുകൾ മാത്രം ബാക്കി നിൽക്കെ എൽഫോർസിയാണ് മലപ്പുറത്തിന് വേണ്ടി ലീഡ് നേടിയത്. ടീമിന് അനുകൂലമായി ലഭിച്ച ഫ്രീ കിക്ക് തൃശ്ശൂർ പ്രതിരോധത്തെ മറികടന്നുകൊണ്ട് എൽഫോർസി കൃത്യമായി വലയിൽ എത്തിക്കുകയായിരുന്നു. പയ്യനാട്ടിൽ ഫോഴ്സ കൊച്ചിക്കെതിരെ എൽഫോർസി നേടിയ മഴവിൽ ഗോളിന്റെ തനിയാവർത്തനമായിരുന്നു തൃശ്ശൂരിന്റെ മണ്ണിലും കണ്ടത്. എന്നാൽ ആദ്യ ഗോളിന്റെ ആവേശം കെട്ടടങ്ങും മുമ്പ് തന്നെ സിലജിത്ത് സാന്ദ്രയിലൂടെ തൃശ്ശൂർ സമനില ഗോൾ നേടി. മലപ്പുറത്തിന്റെ പോസ്റ്റിലേക്ക് നൽകിയ ക്രോസ് ഗോൾകീപ്പറെ മറികടന്നുകൊണ്ട് വലയിൽ എത്തുകയായിരുന്നു. എന്നാൽ 86ാം മിനിട്ടിൽ ഗ്രെയ്‌സ് അഡിയു യുമൗവിലൂടെ മലപ്പുറം വിജയഗോൾ നേടി. തൃശ്ശൂരിന്റെ പ്രതിരോധനിരയെ പൊളിച്ചുകൊണ്ടുള്ള എൽഫോർസിയുടെ പാസിൽ നിന്നുമാണ് താരം ഗോൾ നേടിയത്. മത്സരത്തിന്റെ ആദ്യ പകുതിയിൽ തൃശ്ശൂർ താരം ഹരികൃഷ്ണൻ ചുവപ്പു കാർഡ് കണ്ട് പുറത്തുപോയതും ആതിഥേയർക്ക് തിരിച്ചടിയായി. ബാക്കിയുള്ള നിമിഷങ്ങളിൽ 10 പേരുമായി പന്തുതട്ടിയ തൃശ്ശൂരിന് സ്വന്തം മണ്ണിൽ മലപ്പുറത്തിന് മുന്നിൽ അടിപതറേണ്ടി വന്നു. നവംബർ 21ന് തിരുവനന്തപുരം കൊമ്പൻസിനെതിരെയാണ് മലപ്പുറത്തിന്റെ അടുത്ത മത്സരം. മലപ്പുറത്തിന്റെ തട്ടകമായ മഞ്ചേരി പയ്യനാട് സ്റ്റേഡിയമാണ് വേദി. ഈ സീസണിൽ ഇരു ടീമുകളും ഇതിനുമുമ്പ് നേർക്കുനേർ വന്നപ്പോൾ വിജയം കൊമ്പൻസിനൊപ്പമായിരുന്നു. തിരുവനന്തപുരത്ത് നടന്ന മത്സരത്തിൽ പെനാൽറ്റിയിൽ 4-2നായിരുന്നു തിരുവനന്തപുരം മലപ്പുറത്തെ വീഴ്ത്തിയത്. ഈ തോൽവിക്ക് സ്വന്തം മണ്ണിൽ പകരം വീട്ടാനായിരിക്കും മലപ്പുറം കളത്തിലിറങ്ങുക. മറുഭാഗത്ത് വിജയം തുടരാനായിരിക്കും കൊമ്പൻസിന്റെ ലക്ഷ്യം. Content Highlight: Malappuram fc beat Trissur Magic fc in super league Kerala

കൊമ്പിളക്കി! അവസാന ഹോം മത്സരത്തിൽ കൊച്ചിയെ 3–2നു തോൽപിച്ച് തിരുവനന്തപുരം

Fed up with ads? Go Premium today. അജയ് ബെൻ Published: November 14, 2026 07:10 AM IST Updated: November 14, 2026 09:10 AM IST 1 minute Read Link Copied തിരുവനന്തപുരം ∙ സൂപ്പർ ലീഗ് കേരള ഫുട്ബോളിലെ അവസാന ഹോം മത്സരത്തിൽ വിജയത്തിന്റെ തലയെടുപ്പോടെ തിരുവനന്തപുരം കൊമ്പൻസ്. ഫോഴ്സ കൊച്ചിയെ 3–2ന് തോൽപിച്ചു. ഇരട്ട ഗോൾ നേടിയ തിരുവനന്തപുരത്തിന്റെ വി.അർജുനാണ് പ്ലെയർ ഓഫ് ദ് മാച്ച്. ജയത്തോടെ സെമിഫൈനൽ പ്രതീക്ഷ നിലനിർത്തിയ കൊമ്പൻസിന് സീസണിൽ ഇനി ബാക്കിയുള്ളത് 2 എവേ മത്സരങ്ങളാണ്. 8 മത്സരങ്ങളിൽനിന്ന് 11 പോയിന്റുമായി നാലാം സ്ഥാനത്താണ് കൊമ്പൻസ് ഇപ്പോൾ. 13 പോയിന്റുമായി ഫോഴ്സ കൊച്ചി രണ്ടാമതും. 5 ഗോൾ പിറന്ന സൂപ്പർ പോരാട്ടത്തിൽ ആദ്യം ലീ‍‍ഡെടുത്തത് ഫോഴ്സ കൊച്ചിയാണ്. 23–ാം മിനിറ്റിൽ ഇടതു വിങ്ങിലൂടെ ഒറ്റയ്ക്കു മുന്നേറിയശേഷം ഹർഷൽ റഹ്മാൻ സെക്കൻഡ് പോസ്റ്റിലേ ക്കു നൽകിയ ക്രോസ് നിതിൻ മധു ഹെഡ് ചെയ്തു. നിലത്ത് കുത്തിയുയർന്ന പന്ത് വലയിലേക്ക് (1–0). കൊമ്പൻസ് 35–ാം മിനിറ്റിൽ കെ.ശ്രീരാജിലൂടെ തിരിച്ചടിച്ചു (1–1) 65–ാം മിനിറ്റിൽ‌ പോർച്ചുഗൽ താരം ജോവയുടെ പാസിൽനിന്ന് ലോങ് റേഞ്ചറിലൂടെ വി.അർജുൻ കൊമ്പൻസിനു ലീഡ് നൽകി (2–1). നിശ്ചിത സമയം അവസാനിക്കും മുൻപ് 90–ാം മിനിറ്റിൽ അർജുൻ തന്റെ രണ്ടാം ഗോളും നേടി. (3–1)ഒരു മിനിറ്റിനുള്ളിൽ കൊച്ചി തിരിച്ചടിച്ചു. പൗലോ ഹെൻറിക്കിന്റെ ഹെഡർ കൊമ്പൻസ് ഗോൾകീപ്പറിന്റെ കയ്യിൽ തട്ടി വലയിലേക്ക് (3–2).

കോപ്പലാശാന്റെ ബെൽഫോർട്ട് വീണ്ടും കേരളത്തിൽ; കൊമ്പന് കരുത്ത് കൂടും | DoolNews

സൂപ്പർ ലീഗ് മൂന്നാം കേരളയുടെ മൂന്നാം സീസൺ അവസാന ഘട്ടത്തിലേക്ക് അടുത്തുകൊണ്ടിരിക്കുമ്പോൾ എതിരാളികളെ ഞെട്ടിച്ചുകൊണ്ട് തിരുവനന്തപുരം കൊമ്പൻസിന്റെ വമ്പൻ നീക്കം. കേരള ബ്ലാസ്റ്റേഴ്സിന്റെ മുൻ താരം കേർവൻസ് ബെൽഫോർട്ടിനെ തട്ടകത്തിലെത്തിച്ചിരിക്കുകയാണ് കൊമ്പൻസ്. കഴിഞ്ഞ മത്സരത്തിൽ മുൻ ചാമ്പ്യന്മാരായ കാലിക്കറ്റ് എഫ്.സിയോട് സ്വന്തം തട്ടകത്തിൽ പരാജയം ഏറ്റുവാങ്ങിയതോടെ കൊമ്പൻസിന്റെ സെമിnഫൈനൽ സാധ്യതകൾക്ക് വലിയ തിരിച്ചടിയാണ് സംഭവിച്ചത്. ഇനി സെമിഫൈനൽ സാധ്യതകൾ നിലനിർത്തണമെങ്കിലും മുന്നിലുള്ള മത്സരങ്ങളെല്ലാം തിരുവനന്തപുരത്തിന് നിർണായകമാണ്‌. ഇത് മുന്നിൽ കണ്ടാണ് കൊമ്പൻസ് ഹെയ്തിയുടെ മുന്നേറ്റനിര താരത്തെ കളത്തിലിറക്കാൻ ഒരുങ്ങുന്നത്. സൂപ്പർ ലീഗ് കേരളയിൽ ഇതിനുമുമ്പ് തന്നെ ബൂട്ട്കെട്ടിയ പരിചയസമ്പത്തുള്ള താരമാണ് ബെൽഫോർട്ട്. 2024ൽ ചാമ്പ്യൻമാരായ കാലിക്കറ്റ് എഫ്.സിക്ക് വേണ്ടി ഹെയ്തി താരം കളത്തിലിറങ്ങിയിട്ടുണ്ട്. ബ്ലാസ്റ്റേഴ്‌സ് ആരാധകരുടെ പ്രിയപ്പെട്ട താരം കൂടിയാണ് ബെൽഫോർട്ട്. ഇന്ത്യൻ സൂപ്പർ ലീഗിന്റെ 2016-17 സീസണിൽ ആയിരുന്നു ബെൽഫോർട്ട് കേരള ബ്ലാസ്റ്റേഴ്‌സിന് വേണ്ടി ബൂട്ട് കെട്ടിയത്. കേരളത്തിന്റെ എക്കാലത്തെ മികച്ച പരിശീലകരിൽ ഒരാളായ സ്റ്റീവ് കോപ്പലിന്റെ കീഴിൽ 15 മത്സരങ്ങളിൽ നിന്നും മൂന്ന് ഗോളുകളാണ് താരം നേടിയിട്ടുള്ളത്. ആ സീസണിൽ കേരളത്തിന്റെ മധ്യനിരയിൽ നിറഞ്ഞാടി കൊണ്ട് മലയാളി ഫുട്‌ബോൾ പ്രേമികളുടെ മനസിൽ തന്റേതായ സ്ഥാനം കെട്ടിപ്പടുത്തുയർത്താൻ ബെൽഫോർട്ടിന് സാധിച്ചിരുന്നു. ഐ.എസ്.എല്ലിൽ പിന്നീട് ജംഷദ്പൂർ എഫ്.സിക്ക് വേണ്ടിയും ബെൽഫോർട്ട് കളിച്ചിരുന്നു. കേരളം വിട്ടുപോയിട്ടും കേരളത്തെ മറക്കാത്ത താരം കൂടിയാണ് ബെൽഫോർട്ട്. ബെൽഫോർട്ട് ഇന്ത്യയിൽ നിന്നും പോയതിന് ശേഷം വീണ്ടും കേരള ബ്ലാസ്റ്റേഴ്സിന് വേണ്ടി കളിക്കണമെന്ന് താരം ആഗ്രഹം പ്രകടിപ്പിച്ചുകൊണ്ട് സോഷ്യൽ മീഡിയയിൽ എത്തിയിരുന്നു. കേരള ബ്ലാസ്റ്റേഴ്‌സിന്റെ വിജയത്തിൽ പല സമയങ്ങളിലും താരം സോഷ്യൽ മീഡിയയിലൂടെ സന്തോഷം രേഖപ്പെടുത്തിക്കൊണ്ടും മുന്നോട്ട് വന്നിരുന്നു. ബെൽഫോർട്ടിന്റെ മടങ്ങിവരവ് മലയാളി ഫുട്ബോൾ പ്രേമികൾക്കും വലിയ ആവേശമാണ് ഉണ്ടാക്കിയിരിക്കുന്നത്. Content Highlight: Thiruvananthapuram Kombans sign former Kerala Blasters player Kervens Belfort

ബ്ലാസ്റ്റേഴ്സിന്റെ പഴയ കൊമ്പൻ വീണ്ടും കേരളത്തിലേക്ക്? റാഞ്ചാനൊരുങ്ങി കൊമ്പൻസ് | DoolNews

സൂപ്പർ ലീഗ് കേരള മൂന്നാം സീസണിന്റെ ഗ്രൂപ്പ് മത്സരങ്ങൾ അവസാനഘട്ടത്തിലേക്ക് അടുത്തുകൊണ്ടിരിക്കെ നിർണായകമായ നീക്കം നടത്താനൊരുങ്ങി തിരുവനന്തപുരം കൊമ്പൻസ്. കേരള ബ്ലാസ്റ്റേഴ്സിന്റെ മുൻ താരം കേർവൻസ് ബെൽഫോർട്ടിനെ ടീമിൽ എത്തിക്കാനുള്ള നീക്കത്തിലാണ് കൊമ്പൻസ്. ശേഷിക്കുന്ന നിർണായകമായ ഗ്രൂപ്പ് മത്സരങ്ങൾ ബാക്കിനിൽക്കെ ഹെയ്തി താരത്തെ തിരുവനന്തപുരം തങ്ങളുടെ തട്ടകത്തിലേക്ക് എത്തിക്കാനുള്ള നീക്കത്തിലാണ്. സൂപ്പർ ലീഗ് കേരളയിൽ ഇതിനുമുമ്പ് തന്നെ ബൂട്ട്കെട്ടിയ പരിചയസമ്പത്തുള്ള താരമാണ് ബെൽഫോർട്ട്. 2024ൽ ചാമ്പ്യൻമാരായ കാലിക്കറ്റ് എഫ്.സിക്ക് വേണ്ടി ഹെയ്തി താരം കളത്തിലിറങ്ങിയിട്ടുണ്ട്. താരം വീണ്ടും കേരളത്തിന്റെ മണ്ണിലെത്തുമോയെന്നാണ് ആരാധകർ ഉറ്റുനോക്കുന്നത്. ബ്ലാസ്റ്റേഴ്‌സ് ആരാധകരുടെ പ്രിയപ്പെട്ട താരം കൂടിയാണ് ബെൽഫോർട്ട്. ഇന്ത്യൻ സൂപ്പർ ലീഗിന്റെ 2016-17 സീസണിൽ ആയിരുന്നു ബെൽഫോർട്ട് കേരള ബ്ലാസ്റ്റേഴ്‌സിന് വേണ്ടി ബൂട്ട് കെട്ടിയത്. കേരളത്തിന്റെ എക്കാലത്തെ മികച്ച പരിശീലകരിൽ ഒരാളായ സ്റ്റീവ് കോപ്പലിന്റെ കീഴിൽ 15 മത്സരങ്ങളിൽ നിന്നും മൂന്ന് ഗോളുകളാണ് താരം നേടിയിട്ടുള്ളത്. ആ സീസണിൽ കേരളത്തിന്റെ മധ്യനിരയിൽ നിറഞ്ഞാടി കൊണ്ട് മലയാളി ഫുട്‌ബോൾ പ്രേമികളുടെ മനസിൽ തന്റേതായ സ്ഥാനം കെട്ടിപ്പടുത്തുയർത്താൻ ബെൽഫോർട്ടിന് സാധിച്ചിരുന്നു. ഐ.എസ്.എല്ലിൽ പിന്നീട് ജംഷദ്പൂർ എഫ്.സിക്ക് വേണ്ടിയും ബെൽഫോർട്ട് കളിച്ചിരുന്നു. ബെൽഫോർട്ട് ഇന്ത്യയിൽ നിന്നും പോയതിന് ശേഷം വീണ്ടും കേരള ബ്ലാസ്റ്റേഴ്സിന് വേണ്ടി കളിക്കണമെന്ന് താരം ആഗ്രഹം പ്രകടിപ്പിച്ചുകൊണ്ട് സോഷ്യൽ മീഡിയയിൽ എത്തിയിരുന്നു. കേരള ബ്ലാസ്റ്റേഴ്‌സിന്റെ വിജയത്തിൽ പല സമയങ്ങളിലും താരം സോഷ്യൽ മീഡിയയിലൂടെ സന്തോഷം രേഖപ്പെടുത്തിക്കൊണ്ടും മുന്നോട്ട് വന്നിരുന്നു. അതേസമയം സൂപ്പർ ലീഗ് കേരളയിലെ കഴിഞ്ഞ മത്സരത്തിൽ കാലിക്കറ്റ് എഫ്.സിയോട് തിരുവനന്തപുരം കൊമ്പൻസ് ഒന്നിനെതിരെ രണ്ട് ഗോളുകൾക്ക് പരാജയപ്പെടുത്തിയിരുന്നു. കൊമ്പൻസിന്റെ തട്ടകമായ തിരുവനന്തപുരത്തെ ചന്ദ്രശേഖരൻ നായർ സ്റ്റേഡിയത്തിൽ നടന്ന മത്സരത്തിലെ വിജയത്തോടെ ഈ സീസണിൽ സെമി യോഗ്യത നേടുന്ന ആദ്യ ടീമായും കാലിക്കറ്റ് മാറിയിരുന്നു. സെമി പ്രതീക്ഷകൾ നിലനിർത്താൻ തിരുവന്തപുരത്തിന് ഇനിയുള്ള മത്സരങ്ങൾ നിർണായകമാണ്. Content Highlight: Report says Kervens Belfort will join Thiruvananthapuram Kombans